Genesis 11
A Roho Dagi o Babel
1Ngane e huriki na malala ri tahoka a nita i taku ri vata vona. 2Ri mariu lakea na nirikena haro ri matavisia a bilane Sinar, ri made vona.3Muri ri vata, ri ta maea, “Mu valai, si gi pipi, si gi rata kamumu a brik, ▼ si gi gutu kamumu, ri gi tora.” I uka ma ri bole a kedo, ri bole a brik. Muri ri hudo na kasita a brik. 4Muri ri ta maea, “Mu valai, si gi haea a vuhutanga ne hita. Ge pesi vona tara roho dagi, a mapana ge padoi a hunu, bara si tahoka a rane hita vona. Si gi made tata, i uka ma si gi mariu viliha lae na malala.”
5Pali e BAKOVI DAGI i puru valai, ge kasisia a tanga dagi turana a mapana roho dagi e huriki a bakovi ri haea. 6Lakea e BAKOVI DAGI i ta maea, “Re huriki nga ri pesi taku, ri tahoka a nita i taku ri vakatubu ni haea a mapana roho, pali a ra maki ri luhoi ni rata, bara ri rata kunana. 7Te ge puru te ge vakavaroru a nitane ria, i uka ma ri gi valongokilala a ngava.”
8Lakea, e BAKOVI DAGI i kalipida ria vonga, ri mariu viliha lae na malala, i uka ma ri hae tabua a vuhutanga iea. 9Ni gale a vuhutanga iea e Babel, ▼ a vuhuna e BAKOVI DAGI i vakavilihea a nitane huriki na malala. I vakatubu vonga, e BAKOVI DAGI i vakalipida ria, i vakamariu viliha lae ria, ri lakea na robo lobo na malala.
10A nita na kabu ne Sem i maea: i lobo a pida i rua muri na marungulolo, e Sem i tahoka a pida i 100, lakea i vakabelea e Arpaksad. 11Muri i tahoka tabu a pida i 500, i vakabele e huriki e tuna a bakovi a ngatavine.
12E Arpaksad i tahoka a pida i 35, i vakabelea e Sela. 13Muri i tahoka tabu a pida i 403, i vakabele e huriki e tuna a bakovi a ngatavine.
14E Sela i tahoka a pida i 30, i vakabelea e Eber. 15Muri i tahoka tabu a pida i 403, i vakabele e huriki e tuna a bakovi a ngatavine.
16E Eber i tahoka a pida i 34, i vakabelea e Peleg, 17muri i tahoka tabu a pida i 430, i vakabele e huriki e tuna a bakovi a ngatavine.
18E Peleg i tahoka a pida i 30, i vakabelea e Reu, 19muri i tahoka tabu a pida i 209, i vakabele e huriki e tuna bakovi a ngatavine.
20E Reu i tahoka a pida i 32, i vakabelea e Serug, 21muri i tahoka tabu a pida i 207, i vakabele e huriki e tuna a bakovi a ngatavine.
22E Serug i tahoka a pida i 30, i vakabelea e Nahor, 23muri i tahoka tabu a pida i 200, i vakabele e huriki e tuna a bakovi a ngatavine.
24E Nahor i tahoka a pida i 29, i vakabelea e Tera, 25muri i tahoka tabu a pida i 119, i vakabele e huriki e tuna a bakovi a ngatavine.
26E Tera i tahoka a pida i 70, i vakabele e Abram, e Nahor, e Haran.
27A nita na kabu ne Tera i maea: e Tera ia e tamane Abram, e Nahor, e Haran. E Haran ia e tamane Lot. 28Na tahuna e Tera i tabana ni mahuri, e tuna, e Haran, i mate na tanga ni poda ia vona o Ur, na robo e Kaldia. 29E Abram rua e Nahor ru tahoka e girihine rua. E Sarai, e girihine Abram. E Milka e girihine Nahor. E Milka rua e Iska, e tamane rua e Haran. 30E Sarai i lame, i uka e tuna.
31E Tera i tuli e tuna e Abram, e tubuna e Lot (e tune Haran), e lahuana e Sarai (e girihine Abram), ri pea a tanga e Ur na robo ne Kaldia, ri mariu lakea o Kenan. Pali na tahuna ri bele o Haran, ri made vonga. 32E Tera i tahoka a pida i 205, muri i mate vonga o Haran.
Copyright information for
BNP